يا زين الرجال / أ. محمد المؤذن
يا زين الرجال يا ولد بلادي
عليك كنادي يا زين الرجال
يا اللي في البال عليك ضربت الفال
نويت والفال قال بلي انت بو لعيال
تخيلتك قدامي شفتك في منامي
وقلت في كلامي ها زهري ها تخمامي
تزاد ترعادي طلعت تنهادي
بان نور زال ظلامي تزاد حبي وغرامي
ما تكونش انت سباب نكادي
راه أصلك حتى فصلك
من اجدادي انا ليك عروسة
انا ليك محروسة بلا بيك ولد بلادي
حياتي منحوسة بلا بيك متعوسة
معاك يكمل رجاي ويكمل مرادي
قلبي هواك وبغاك معاك ندق اوتادي
يا عزري فين تبري أنا حداك فين غادي
معاك أنت نولد ونربي أولادي
أجي دق باب دارنا مالك تخمم
قول بسم الله واقرا الفاتحة
ما تفكر ما تهز هم هاك يدي لمحنية
ركب الخاتم لازم تزعم
القدر حكم لزواجي تقدم
حصن نفسك راك مومن ومسلم
صون عرض الناس وعيش سالم
النزوة حرام وخا سبابها غرام
ولحلال ، حلال على سير الدوام
النزوة زلة وعلة وبها يتخلط الدم
والزينة رذيلة تمارسها تندم
انت زين الرجال انت ولد بلادي
بك يكمل رجاي ويتحقق مرادي
تحت سقف بيتك بغيتك تكون وسادي
بغيتك تكون جد احفادي
محمد المؤذن مؤسس جمعية كازابلانكا
للتراث الشعبي - المغرب
للتراث الشعبي - المغرب
ليست هناك تعليقات:
إرسال تعليق